Urtez urteko lana

Euskal Herriko Artzain Txakur Elkartea

 

Aurtengoan 50 urte betetzen ditu Gipuzkoako Artzain Txakur txapelketak eta aukera hau aprobetxatu nahi dugu antolatzaileak, EHATE elkarteko kideak omendu eta bide batez gure esker ona adierazteko. 1987. urtean  elkartea sortu zenetik txapelketaren antolaketan aritu izan dira eta gure aldetik Legazpin egin duten lana bereziki eskertu nahi diegu beraiek arduratu dira eta neurri handi batetan lehiaketaren antolaketaz.

Txakurra izan du eta du gaur egun ere artzainak bere lagunik handienetako bat. Laguna eta lankidea, ez baitago zalantzarik ondo hezitako txakur batek laguntza handia eskaintzen diola artzainari, artaldea gobernatzeko orduan. Eta ez soilik artzainaren ikuspegitik. Txakur on bat mesedegarri da artaldearen ongizatearen aldetik ere.

Artzain txakurren lan hori ezagutzera eman nahirik eta omen egin nahirik sortu ziren joan zen mendearen erdi aldera artzain txakur lehiaketak.

1955ean jokatu zen Oñatin Euskal Herriko lehenengo txapelketa. Aurretik, 1948an, Katalunian, Ribes de Freserren, hasiak ziren halako txapelketak antolatzen eta handik ekarri zuten Oñatiarrek eredua.

Lehenengo ernamuin hartatik hasita, Euskal Herri osoan zabaldu ziren lehiaketak eta 60ko hamarraldiaren amaieran Hegoalde guztian hasi ziren herrialdeko txapelketak antolatzen. Herrialdeko antolaketa horiek elkarren artean koordinatzen hasi ziren eta 1990eko hamarraldiaren amaieran, bertako artzain txakurra eta artzain-mundua babestu eta bultzatzea helburu zuen mugimendu hark legezko forma hartu zuen: alde batetik, herrialde mailako elkarteak sortu ziren eta, bestetik, elkarren arteko koordinazioari ere forma juridikoa eman zitzaion, 1987an EHATE (Euskal Herriko Artzain Txakurren Antolatzaileen Elkartea) sortuaz.

Esan bezala, txakurrarekin lotuak dira EHATEren helburu eta jarduera nagusiak. Eta lan horren barruan bertako artzain txakur arrazak babestu eta bultzatu nahi dira, hainbat urtetan zehar erakutsi dutelako lanerako oso txakur egokiak direla eta gaur egun kanpoko beste arraza batzuen etorrerarekin baztertzeko eta galtzeko arriskuan daudelako. Gaur egun, txapelketetan parte hartzen duten txakur gehien-gehienak Euskal Artzain Txakur arrazakoak dira, Gorbeia motakoak, baina parte har dezakete eta bultzatu nahi dira Euskal Herrian ohikoak izan diren eta diren beste arrazak ere: bertako iletsua, Pirinioetako txakur txikia, labrita…

Aipatu beharreko puntua da 1999an Eusko Jaurlaritzak artzain txakur txapelketek txapelketa ofizial-tzat jotzeko bete beharreko baldintzak arautu zituela[1] eta harrez gero, EHATEren inguruan antolatzen diren txapelketa nagusiek (herrialdeetakoek, Euskal Herrikoak eta Oñatiko nazioartekoak) txapelketa ofizialaren aitorpena dutela, Jaurlaritzaren aldetik.

Baina, lehiaketez gain, gaur egun, txakurron heziketari eman nahi zaio garrantzi berezia eta horretarako ikastaroak, heziketa-taldeak eta abar antolatzen dira.

Eta, beste alde batetik, EHATEren helburua bada, txakurra aitzakiatzat hartuta, artzainen mundua gizartean ezagutzera ematea eta bultzatzea ere. Horretarako, artzain txakur txapelketen jiran hainbat ekitaldi antolatu ohi dira: artzain-egunak, artzaintzako produktuen dastaketak, omenaldiak, ikastaroak…

Aipagarria da, era berean, mugimendu honen sorreran katalanekin izan zen lankidetza hark gaur egun ere bizirik dirauela eta Euskal Herriko artzainak Kataluniara joan ohi direla hango lehiaketetan parte hartzera, gonbidatu gisa, eta Kataluniakoak ere etorri ohi direla Oñatiko Nazioarteko txapelketara. Urtean Herrialde Katalanetako dozena bat lehiaketatara joaten dira Euskal Herriko artzainak.

Gipuzkoako Txapelketa Ezkio-Itsason hasi zen 1968an, bertako gazteen ekimenez. Horren eragile izan omen zen herriko artzain batek, Angel Aranzadik, Xol txakurrarekin, oso lan onak egiten ziharduela zenbait lehiaketatan. Ezkioko txapelketan bertan ere bost aldiz jarraian izan zen Xol txapeldun 1971 eta 1975 artean. Harrez gero, izan ziren beste hiru artzain kopuru horretara iritsi edo gainditu zutenak ere: Jose Antonio Arrillaga, Jesus Mari Plazaola eta Juan Jose Arrizabalaga.   

Aipagarria da Migel Arregi Oñatiarraren kasua ere. 1971n hartu zuen parte Gipuzkoako txapelketan lehen aldiz eta urte horretan bertan Katalunian jokatu zen “Campeonato Nacional”-ean irabazle izan zen. Gero, urte askoan parte hartu gabe egon ondoren, orain dela 8-10 urte berriz itzuli zen eta gaur egun ere ohiko parte-hartzailea da.

Gipuzkoako Txapelketa Ezkio-Itsason antolatu zen 2000. urtera arte eta handik aurrera Legazpiko Gipuzkoako Artzain Egunaren barruan txertatu zen.

EHATEren partetik, artzain gazteak animatu nahi dira, bertan parte hartzera: dela lehiaketan edo formazio-ikastaroetan. Eta prestutasun osoa agertzen da norbaitek bertako arrazako txakurra lortu nahi izanez gero, horretan laguntzeko ere.  Edozein argibide nahi duena EHATErekin jar daiteke harremanetan, helbide honetara idatziaz: Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. 

 

[1] (Agindu baten bidez,https://www.euskadi.eus/y22-bopv/es/bopv2/datos/1999/08/9903691a.pdf)

Artzai Gaztaren Lehiaketa

Artzain Txakur Txapelketa


Copyright © 2014 LEGAZPIKO UDALA - Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko.
Diseinua ACV MULTIMEDIA

UA-3468462-3